Bu gün Milli Olimpiya Komitəsinin 30 illik yubileyinə həsr olunan stolüstü tennis turniri keçirilib. “Şüa” İdman Kompleksində təşkil olunan yarışda Azərbaycanın ən güclü stolüstü tennisçiləri bacarıqlarını göstəriblər. Milli komandanın üzvlərinin qatıldığı yarışın açılış mərasimində çıxış edən Azərbaycan Stolüstü tennis Federasiyasının vitse-prezidenti Elmar İslam və Milli Olimpiya Komitəsinin əməkdaşı İntiqam Səfərov MOK-un Azərbaycan idmanının inkişafındakı rolundan söz açıb, qurumun səmərəli fəaliyyətinin yeni uğurlara zəmin yaratdığını vurğulayıb.

Yubiley turniri eyni zamanda İslamiada ərəfəsində qüvvələrə son baxış xarakteri daşıyıb. Gərgin və maraqlı mübarizənin nəticələrinə əsasən kişilərin turnirində Emin Məmmədov qalib gəlib. Vəzir Allahverdiyev 2-ci, Adil Əhmədzadə 3-cü yeri tutub.
Qadınların mübarizəsi Ləman Abdulhəmidovanın qələbəsi ilə yekunlaşıb. Arzu Aslanova fəxri kürsünün 2-ci, Mərziyyə Nurmətova 3-cü pilləsinə qalxıb.
Fərqlənən idmançılara Azərbaycan Stolüstü Tennis Federasiyasının və Milli Olimpiya Komitəsinin mükafatları təqdim olunub.

Stolüstü tennisçilər Türkiyənin Konya şəhərində keçiriləcək İslam Həmrəyliyi Oyunlarına hazırlığı davam etdirirlər. Seçmə komanda bu məqsədlə Qax Olimpiya İdman Kompleksində bir araya gəlib. Bu gün başlanan növbəti təlim-məşq toplanışında baş məşqçi Mixail Timofeyev və böyük məşqçi Fərhad İsmayılovun rəhbərliyi altında 10 idmançı iştirak edir. Söhbət Vəzir Allahverdiyev, Nihad Məmmədov, Emin Məmmədov, Adil Əhmədzadə, İbrahim Ansari, Əliverdi Şahgəldiyev, Nəzakət Qarayeva, Ləman Abdulhəmidova, Zemfira Mikayılova və Mərziyyə Nurmətovadan gedir. İdmançılar iyulun 31-nədək davam edəcək toplanışda fiziki, texniki və taktiki bacarıqlarını artırmağa çalışacaqlar.

Qeyd edək ki, stolüstü tennisçilərin İslam Həmrəyliyi Olyunlarında mübarizəsinə avqustun 7-də start veriləcək.

Bu gün Serbiyanın paytaxtı Belqradda yeniyetmə stolüstü tennisçilərin Avropa çempionatına start verilib. Yarışın ilk günündə oğlanlardan ibarət Azərbaycan seçməsi Sloveniya kollektivi üzərində 3-1 hesabı ilə qələbə qazanıb. Komandamız sabah Avstriya millisi ilə üz-üzə gələcək.

İlk oyunda Yunanıstan seçməsinə 1-3 hesabı ilə uduzan qızlardan ibarət milli isə, ardınca Monteneqro komandasına qalib gəlib - 3:0. Qrup mərhələsində növbəti rəqib İsveç kollektivi olacaq.

Xəbər verdiyimiz kimi, mötəbər yarışda məşqçilər Elnur Hidayətzadə və Ramil Cəfərovun rəhbərliyi ilə Arzu Aslanova, Aylin Əsgərova, Mərziyyə Nurmətova, Adil Əhmədzadə, Hüseyn Eylazov və Onur Quluzadə komanda turniri ilə yanaşı şəxsi, qoşa və qarışıq qoşa yarışlarında da bacarıqlarını göstərəcək. Beynəlxalq dərəcəli hakimlər Könül Mikayılova ilə Zaur Mikayılov da, Avropa birinciliyində ölkəmizi təmsil edir. Yarışa iyulun 16-da yekun vurulacaq.

Yeniyetmə stolüstü tennisçilərdən ibarət Azərbaycan millisi bu gün Avropa çempionatının keçiriləcəyi Belqrad şəhərinə yola düşüb. Xəbər verdiyimiz kimi, Serbiyanın paytaxtında keçiriləcək mötəbər yarışda məşqçilər Elnur Hidayətzadə və Ramil Cəfərovun rəhbərliyi ilə Arzu Aslanova, Aylin Əsgərova, Mərziyyə Nurmətova, Adil Əhmədzadə, Hüseyn Eylazov və Onur Quluzadə etimadı doğrultmağa çalışacaq. Sabah başlanacaq birincilikdə oğlanlardan ibarət komanda “E” qrupunda Avstriya və Sloveniya seçmələri ilə yarışacaq. Qızlardan ibarət Azərbaycan millisi isə “H” qrupunda İsveç, Yunanıstan və Monteneqro kollektivləri ilə mübarizə aparacaq. İdmançılar komanda turniri ilə yanaşı şəxsi, qoşa və qarışıq qoşa yarışlarında da bacarıqlarını göstərəcəklər. Beynəlxalq dərəcəli hakimlər Könül Mikayılova ilə Zaur Mikayılov da, Avropa çempionatında ölkəmizi təmsil edəcək. Avropa birinciliyinə iyulun 16-da yekun vurulacaq.

Şəhid general – mayor Polad Həşimovun xatirəsinə həsr olunan Stolüstü tennis üzrə Azərbaycan birinciliyinə yekun vurulub. Xaçmaz Olimpiya İdman Kompleksində keçirilən yarışda 2010-cu il təvəllüdlü və daha az yaşlı idmançılar iştirak ediblər. Şəxsi xarakter daşıyan ölkə birinciliyində Bakı, Sumqayıt, Şabran, Quba, Gədəbəy, Salyan, Zərdab və digər şəhər və rayonlardan 70-ə yaxın stolüstü tennisçi qələbə uğrunda mübarizə aparıb.
Bu gün keçirilən həlledici görüşlərin nəticələrinə əsasən, qızlar arasında Yağmur Məmmədli (Sumqayıt) ölkə çempionu adını qazanıb. Xədicə Eylazova (Sumqayıt) 2-ci, Banu Baytallı ilə Aynur Ağayeva (Bakı) 3-cü yeri tutub.
Oğlanların mübarizəsi Onur Quluzadənin (Bakı) qələbəsi ilə başa çatıb. Tunar Bağırov (Şabran) gümüş, İbrahim Rəhimzadə (Bakı) və Uğur Nəzərli (Sumqayıt) bürünc medala layiq görülüb. Fərqlənən idmançılar gənclər və idman nazirliyinin diplomları və ASTF-nin qiymətli hədiyyələri ilə mükafatlandrılıblar.
Qeyd edək ki, birinciliyin keçirilməsində əsas məqsəd, şəhid general-mayor Polad Həşimovun xatirəsini yad etməklə yanaşı, stolüstü tennisin bölgələrdə təbliği, bu idman növünün kütləviliyinin artırlıması, perspektivli idmançıların üzə çıxarılması və seçmə komandanın heyətinin müəyyənləşdirilməsi idi.

Bu gün şəhid general – mayor Polad Həşimovun xatirəsinə həsr olunan Stolüstü tennis üzrə Azərbaycan birinciliyinə start verilib. Xaçmaz Olimpiya İdman Kompleksində keçirilən yarışa 2010-cu il təvəllüdlü və daha az yaşlı idmançılar qatılıblar. Şəxsi xarakter daşıyan ölkə birinciliyində Bakı, Sumqayıt, Şabran, Quba, Gədəbəy, Salyan, Zərdab və digər şəhər və rayonları təmsil edən stolüstü tennisçilər qələbə uğrunda mübarizə aparırlar.
İyulun 29-da yekunlaşacaq yarışda ilk 3 yeri tutan idmançılar gənclər və idman nazirliyinin diplomları və ASTF-nin qiymətli hədiyyələri ilə mükafatlandırılacaqlar.
Qeyd edək ki, birinciliyin keçirilməsində əsas məqsəd, şəhid general-mayor Polad Həşimovun xatirəsini yad etməklə yanaşı, stolüstü tennisin bölgələrdə təbliği, bu idman növünün kütləviliyinin artırlıması, perspektivli idmançıların üzə çıxarılması və seçmə komandanın heyətinin müəyyənləşdirilməsidir.

Yeniyetmə stolüstü tennisçilərimiz iyulun 6-dan 15-dək Serbiyanın paytaxtı Belqradda keçiriləcək Avropa birinciliyinə hazırlığı davam etdirirlər. Hazırlıq prosesinin növbəti mərhələsi bu gün Xaçmaz Olimpiya İdman Kompleksində yekunlaşıb. Seçmə komandanın məşqçisi Elnur Hidayətzadə təlim-məşq toplanışı, idmançıların hazrlıq səviyyəsi və qitə birinciliyindəki imkanlar barədə sualları cavablandırıb:
-Yeniyetmə stolüstü tennisçilərimizi qarşıda ciddi sınaq gözləyir. Seçmə komanda Avropa çempionatına necə hazırlaşır?
-Komandamız yarışa çox ciddi şəkildə hazırlaşır. Azərbaycan Stolüstü Tennis Federasiyası il ərzində müxtəlif yaş qrupları üzrə seçmə komandaların təlim-məşq toplanışlarını təşkil edir ki, bu da, beynəlxalq yarışlara lazımı hazırlıq üçün olduqca əhəmiyyətlidir. Bildiyiniz kimi 2 il pandemiya dövründə beynəlxalq yarışlarda iştirak etməmişik. Pandemiyadan sonra ilk dəfədir ki, belə bir motəbər yarışa qatılacağıq. Seçmə komandanın heyəti 13-14 yaşlı Azərbaycan çempionlarından təşkil olunub. Avropa birinciliyində isə, əsasən 15 yaşlılar qüvvələrini sınayacaqlar. Bu baxımdan idmancilarımızın özlərindən böyük rəqiblərlə qarşılaşacağını söyləmək olar. Bu heyət gələn il artiq öz yaş qrupunda nübarizə aparacaq.
-Xaçmaz Olimpiya İdman Kompleksində təşkil olunan təlim-məşq toplanışı haqqında ətraflı məlumat verərdiniz. Hazırlıq hansı plan üzrə aparılırdı? Komandada əhval-ruhiyyə necədir?
-10 gün Xaçmaz Olimpiya İdman Kompleksində təlim-məşq toplanışı keçirildi. Bu toplanışda idmançılarla əsasən texniki - taktiki hazırlıq üzərində iş apardıq. Nəticələrdən razıyam. Avropa birinciliyinə son məşqlərimizi Bakida keçirəcəyik. Komandada əhval-ruhiyyə yüksək səviyyədədir. İdmançılarımız səbirsizliklə yarışa qatılacaqları günü gözləyirlər. Ümid edirəm ki, onlar etimadı layiqincə doğruldacaqlar.
-Avropa birinciliyinin püşkatmasını necə dəyərləndirirsiniz? Rəqibləri yəqin ki, analiz etmisiniz...
-Rəqiblərimizi tanıyırıq. Oğlanların qrupunda ən güclü rəqiblərdən biri Avstriya komandasıdır. Bu komanda daim Avropa birinciliklərində yüksək nəticələr göstərib. Qizların yarışında isə, İsveç komandasını xüsusi vurğulamaq olar. Bu kollektiv də müntəzəm olaraq mükafatçılar sırasında yer alıb. Digər rəqiblərimizdən Sloveniya, Monteneqro və Yunanıstan seçmələrini də, fəqrləndirə bilərəm.
-Komandanın yarışa hazırlığını və rəqiblərin imkanlarını nəzərə alaraq, Avropa birinciliyində hansı nəticələrə ümid bəsləyə bilərik?
-Qitə birinciliyi həmişə çox gərgin mübarizə şəraitində keçir. Yəqin ki, bu dəfə də istisna olmayacaq. Belqrad sınaqları pandemiyadan sonra ilk böyük yarışlardan biridir və hər bir komanda bütün bacarığını ortaya qoymağa çalışacaq. Biz də, ölkəmizi layiqincə təmsil etmək üçün əlimizdən gələni əsirgəməyəcəyik.

Yeniyetmə stolüstü tennisçilərin Avropa çempionatının püşkü atılıb. Monteneqronun Podqoritsa şəhərində təşkil olunan mərasimdə Azərbaycan seçmə komandalarının da rəqibləri müəyyənləşib. Püşkün nəticələrinə əsasən oğlanlardan ibarət komandamız “E” qrupunda Avstriya və Sloveniya seçmələri ilə mübarizə aparacaq. Qızlardan ibarət Azərbaycan milli komandası isə “H” qrupunda İsveç, Yunanıstan və Monteneqro kollektivləri ilə yarışacaq. İdmançılar komanda turniri ilə yanaşı şəxsi, qoşa və qarışıq qoşa yarışlarında da bacarıqlarını göstərəcəklər. 15 yaşadək stolüstü tennisçilərin Avropa birinciliyi iyulun 6-dan 15-dək Serbiyanın paytaxtı Belqradda keçiriləcək. Mötəbər yarışda məşqçilər Elnur Hidayətzadə və Ramil Cəfərovun rəhbərliyi ilə
Arzu Aslanova, Aylin Əsgərova, Mərziyyə Nurmətova, Adil Əhmədzadə, Hüseyn Eylazov və Onur Quluzadə qələbə uğrunda mübarizə aparacaq. Beynəlxalq dərəcəli hakimlər Könül Mikayılova ilə Zaur Mikayılov da, Avropa çempionatında ölkəmizi təmsil edəcək.